الدكتورة : ليلى صالح عزوز
ـــــــــــــــــــــــــــــــــــــــــــــــــــــــــــ
ما يرفع ضغطي شَي زَي كلمة حقوق المرأة .. وبالذات في السعودية .وهادي المشكلة طلعت متى؟
بعد 11 سبتمبر .... سبحان الله .. يعني كانوا من ألف وأربعمية سنه نايمين .. وفجأة كده صحيوا
وقالوا: وه ياندامة .. إيش هادا ؟ أتْـرِنُّو إحنا لنا حقوق ؟! ... مادام كده ...
الإنتخابات البلدية ليه ما نشارك فيها ؟ وليه ما نروح هناك ونرقع بالصوت ؟
يا أختي حلال عليكم البلدية كلها .. يعني إيش تبغوا تسووا ؟
تحطوا ضوابط إصدار الرخص لمحلات الحلاقة مثلا ؟
والا تناقشوا سفلتة الشارع اللي يودي على بيت أم إبتسام ؟
والا ليه الشارع الفلاني ما فيه كوافيرة مغربية وكل اللي فيه مصريات؟
يا أختي ريِّحي راسك . اذا كثير من الرجال ما سوُّوا حاجه ... بالله عليكي حتسيبي بيتك وعيالك وشغلك ... عشان تناقشي مشروع إنتخابي؟ هادا من تمام الفضاوه ..
طيب قولوا لوحْدَه زواج أختها الليلة ، بلاش تروحي للكوافيره اليوم يا مدام ، وتعالي نناقش حقوق المرأة ، أو نحضر المجلس البلدي و نتخذ قرارات مهمة .. وأترك لكم جوابها .. إيش يكون
أما عن حقوق المرأة في السعودية .. فياسيدي الست هنا لها حقوق وواجبات ما تتنازل عنها .
مثلا: في بلدان كثير عربية وأوروبية ، تلاقي شحط طويل عريض جالس في الباص ... وقدامه واحدة في الشهر التاسع واقفه على رجولها وشايله طفل تاني على كتفها .... إن الشحط يتحرك ؟ .. أبدا ...
إن الثور يحس؟ ... لايمكن .
لكن هل يمكن يحصل هادا في السعودية ؟ إطلاقاً ..
واللي يبغى يجرب.... الطريق قدامو .... يا عمي العملية كلها دلع حريم في دلع حريم ... رايح أعطيكم بعض الأمثلة وقولوا لي مين اللي آخِد حقُّوقه بالكامل وزيادة ؟
وهل عندنا المرأة متساوية مع الرجل .. والا هي أحسن مِنُّو؟
قال حقوق المرأة .. قال .
منظر عام
رجال محترمين زي الورد واقفين أمام صراف في بنك .. وتِجي أختنا في الله
)اللي يقولو إنها مهضومة الحقوق)
تتقدم للصراف (ِATM) مباشرة ولا على بالها من الطراطير اللي واقفين من ساعات ..
وبعضهم مستأذنين من عملهم. طيب ليه ما توقِّف تِمسك سِرا - بالطابور - ورا عشرين بنغالي ... وثلاثين باكستاني ... وخمسين سعودي واثنين معقبين معاهم شوية فواتير مقاس إكس لارج
.. وإذا أحد كلمها وقال لها اتفضلي يا أختي ترد عليه وتقول: لا، معليش. المرأة زَيّ الرجال
.... خليني في الطابور .... زَيِّي زيكم؟! .... ليش ما تقول كده ؟! ... والا هي تماحيك وبَس !
ونفس المنظرفي الجوازات .... والأحوال ... والتأمينات .. ويقدر أحد... يقول إنه من ظهر أبوه ... يفتح فمُّه؟ ... على طول يسمع العبارة الشهيرة ... ( عيب عليك .... إنت ماتستحي؟ .. هذه حرمة...إنت ما عندك أهل ...( !ويضطرالراجل إنُّه ينكتم ويسكت .. بل إن المرأة تشفع للراجل جوزها عشان يتقدم على الرجال الباقين . في المطار .. مثلا .. ما تشوفهم يطلِّعوا العوايل أوَّل .. وبعدين بقية الركاب ؟
قال حقوق المرأة ... هههه!
اقتصادياً
شوف الراجل .. السبع .. الغضنفر ... المفتري ... له ثوبين أوثلاثة في السنة .. يروح بها العمل ، ويحضر بها المناسبات عزايم وزواجات ، ويقابل بها كبار المسؤولين ، الخ، الخ، الخ ...
والمرأة بسلامتها .. بقيمة أدوات مكياجها فقط ...
تقدر تفتح محل خياطة رجالي محترم . ويا ريت تحط من مكياجها في البيت .. لأ.
دا بَس للخروج ... وقيمة صباع روج والا علبة بودرة تساوي قيمة جوال جوزها
.. وكمان أزيدك من الشِّعر قَصر .. مش بيت .. من حقوقها فستان لكل فرح ، و مكياج .
وكوافيرة .. وجزمة.. وشنطه . وكمان خُدوا هادي .. سابع - سبوع - بنت عمي . ملكة - عقد زواج - أخت جارتنا . ولازم هدية. واللطخ يدفع .مو مهم الفلوس جات من فين .. المهم يدفع .. والدنيا ممكن تنقلب على الراجل واللي خَلَّفوه علشان موضوع (مهم وحيوي زي كده.(
قال إيه ..حقوق المرأة .
نفسياً
الزوج مطالب يكون أربعة وعشرين ساعة رومانسي ومبتسم ، والا يبقى جلف وإبن ستين في سبعين ..
ويعني إيه عنده مشاكل في العمل؟! والا أقساط متأخرة ؟ والا فواتير ؟ والا مقاضي - حاجيات للبيت - ما يعرف كيف يجيبها ؟!
مو مهم ..واجب عليه إنه يرجع من العمل للبيت مروِّق ومبسوط وبَس ... كإنه كان في شرم الشيخ مصيف مع نانسي عجرم .. (( مجرد مثل .. تف .. بره وبعيد (( ....
والست بسلامتها من ساعة ما يرجع من عمله .. وقبل ما يفصخ حوايجو - يخلع ملابسه - : شوف بزورتك - أولادك - (لاحظوا .. بزورتك - كأنهم أولاده هو فقط ) طفَّشوني .. إيش رأيك نغير غرفة النوم ؟ التلفون ما فيه حرارة ...
جاتني رساله على الجوال يقولوا الفاتورة طلعت .. أَلحق سّدِّد و قبل ما يوقفوه عن الخدمه ... ... ومع هادا كُّله ..لازم يبقى رومانسي .
بينما هي وبكل سهولة تصحى بسلامتها في الظُهر .. وتجد الكارثة الكبرى ... يوه ... ما عندنا صلصه .. وبكل رقة تتصل ... ألو ألو ... أبو خالد موجود ؟ ممكن أكلمه لو سمحت ؟ ألو . . . إيوه ... أنا ..
حتكون مين يعني ؟ ... المهم ... جيب معاك غدا ... ماهو إنت يا فالح نسيت تجيب صلصه معاك أمس .
ولإنه موفاضي .. و قرفان من العمل .. يصدق المسكين إنه هو إللي نسي ويقول بكل شجاعة ..... طيب.
وفوق هذا كله آخر السنه : طفشانه ....فين حتودينا ... والله بنت خالتي راحت أمريكا .... وبنت عمي ما تصيف إلا فْ أوروبا .. . يا عيني علينا إللي ما نروح غير يا مصر... يا سوريا ... والسنة اللي غيَّرنا فيها ... رحنا ماليزياوماتقول شوف زوجة فلان ايش عملت لزوجها لانه من المحضورات .
وفي رمضان: تعبت ....أوف ..... إنت داري عن حاجة ؟ أنا أبغى خدامة ... أنا خلااااااااص .. ومن ثالث يوم رمضان .. مقاضي العيد ... أختي جابت ملابس لها ولعيالها .. إيش أقولَّك بس ... و خُد مشاوير لليييييييييييل ... والراجل المسكين لما ينزل السوق مع مرته ما يقدر يشتري ولا اااا شَي لنفسه، لأنه طول الوقت ماشي وراها من دكان لدكان، وشايل زنابيل - أكياس - لحد ما كتفو يتخلع . وهي تطالع فيه وهو يتطوَّح من ثقل الزنابيل - الأكياس - .. ولا تقول له فزعه - مساعدة - .. حتى لو بالكِدِب . وآخرتها بعد ما يرجع البيت تقول لو إنها لِسَّه ما اشترت ملابس العيد !!!! وإذا فكَّر ينزل السوق لحاله عشان يشتري شي لنفسه ... على طول يكون مشبوه .. إيش ينزلك لوحدك وسط الحريم ؟ .. طيب إنت مو كنت معايا في السوق .. أحد قال لك لا تشتري ؟
قال إيه ؟ ... حقوق المرأة .
شرعاً
المرأة لها حظ من أبوها .... وحظ من زوجها . هادا غيرأمها .. وأخوانها ... وأبناءها .. والراجل بالطبع مطالب إنه هو اللي يصرف عليها مهما كان عندها فلوس .
وثانيا : الرجال لازم يروحوا للمسجد خمس مرات في اليوم .. جُمَع وجماعات . حر وبرد .. ليل وصبح .. لازم يروحوا ... بينما الست تصلي تحت المكيف ... في غرفتها .. وأجرها زي الرجال تماما .... ياعيني .. يا عيني ..والله الإسلام أعطاكم كتير .... وياريتو يِبان فيكم
الثلاثاء أكتوبر 12, 2010 10:54 pm
