بسكم إيميلات كاذبة ... شوف بتضحك

تراكم ازعجتووونا وضيقتوا صدورنا

والله الدنيا ترى ماتسوى... والرب واحد والعمر واحد....

ياجماعة نبي نفتح الإيميل عشان نستانس، مو عشان تلوع كبدنا ....

ياجماعة نبي نضحك، نبي نحب الحياة، نبي نتعلم شي جديد مفيد موب ضيقة الخلق...

كفاية الدنيا فيها أحزان ومصايب.. بعد الإيميل ما خليتوه في حاله؟؟

إلا عصير البرتقال ماركة الديك يسوي سرطان

وإلا كورن فلكس النمر يسبب داء الجنون

والفاضيين: قائمة بالمواد الغذائية اللي فيها مادة ABCD XWZ 007

واللي تقطع النسل وتذبح جميع البشر وتسبب التسونامي

واللي أفضى منهم: الدونت والبطاطس المقلية مخطط شنيع لنشر الصهيونية بواسطة دهن الخنزير

والمصدقين روحهم: أمريكا تغزو ديار المسلمين بواسطة شيبس ليز وسنكرز، وقد وجب الجهاد

واللي مسوين روحهم أطباء:

شرب الماء البارد بعد المندي = سرطان القولون، وإلا سرطان الجهاز الهضمي كله أحسن

شرب اللبن قبل الدجاج المشوي التندوري (مو البروستد) = قرحة في المعدة إلى الأبد وماتروح

أكل السلطة في صحن مسطح من غير ليمون = ديسك في الظهر والرقبة واليد اليسرى

ومع ليمون = التهاب المفاصل والركب والإصبع الصغير

عدم أكل وجبة الإفطار الساعة 6 = انسداد في الأوردة بالإسمنت

خبز الخباز = أمراض الكبد وإنفلونزا الدجاج

واللي مسوين روحهم أصحاب نصيحة:

لا تآكلون سويت - لاتآكلون برجر

لا تآكلون آيس كريم - لا تآكلون سمارتيز

لا تآكلون خبز وجبن

لا لا لا لا لا لا لا لا لا لا .....

شدعوة...؟؟؟

وشششششش ناكل طيب؟؟

كل ما طلع شي جديد ذبحتونا عليه...

شيليز وكرسبي كريم وماكدونالد وستاربكس وبيبسي هدوا العالم كله وقرروا يخلون المسلمين يأكلون خنزير....

ترى ازعجتونا

كل شي مسرطن؟؟؟

يالله...

كل شي زين وحلو وناجح فيه دهن خنزير وجزء من المؤامرة الصهيونية الكبرى..؟؟

سلامات...

ترى فلسطين راحت بدون دونت كرسبي كريم

وأفغانستان يقصفونها كل يوم بقنابل متقدمة مو ببطاطس مكدونالد وبدون كوب من ستاربكس

اتركوا عنكم الخرابيط.... واتركوا عنكم حكي الإشاعات...

الموبايل يسبب التفوئيد

والصابون سرطان مباشر ما في كلام

وشامبو جونسون للأطفال اللي كلنا سبحونا فيه واحنا صغاار يسبب السرطان ويقضي على الأجيال

واللابتوب يسبب الحصبة

والواير تبع تلفزيون الصالة فيه ذبذبات خطيرة تسبب جنون البقر

كل مافتحنا الإيميل: إحذروا.... الامر خطير.... لا يجب السكوت عنه....

حصل في البحرين: سيدة خذت كارد فيه مادة مخدرة وصادتها دوخة وباقوا فلوسها

هام جداً جداً جداً جداً جداً جداً جداً

حصل في مجمع الدانة واكتشفت الشرطة عصابة تنقل الإيدز

شالخرابيط؟؟؟ تنصبون على الناس؟؟ تطلعون إشاعات وترجونها ليش؟؟؟

وكله كوم... وإيميلات الحلال والحرام وما بينهما كوم ثاني

فتاوى الإيميل الحديثة، هذا حرام، وذاك حرااااام مضاعف، وجهنم الحمرا تنطركم كلكم، والموت وعزرائيل يحسبون لكم الدقايق...

ياجماعة ترى رب العالمين شديد العقاب صح

بس بعد غفور رحيم، وسعت رحمته كل شئ

والحي أبقى من الميت..

والرسول عليه الصلاة والسلام جدّم الفرح على الحزن...

والله قال: "ولا تكن فظاً غليظاً"

هاذي غير وصايا وتحف الاستهبال:

الشيخ فلان مكشوف عنه الحجاب شاف منام اللهم صل عالنبي

وكلكم لازم تقرون الإيميل وترسلونه لـ 10 أشخاص وإلا بينهار سد مأرب... هع؟؟؟

بسكم عاد من سوالف الترهيب والفتاوى اللي تلف الانترنت كل يوم...

وما يفق مرارتي الا جماعة "ارسلها"... عشان خاطر حبايب خالة جيرانكم ترسلها... ارسلها ترى بتندم... ارسلها أمانة عليك يوم القيامة.... استحلفك أن ترسلها.. رح زين

وانت منو تحملني أمانة وتستحلفني مرة وحدة يا أخي؟؟؟

وعيال عمهم: جماعة "انشر".. إعلان هو؟؟ ولا تسويق إجباري؟؟

موب ناقص الا يقولون لك: "انشر احسن لك" أو "احترم نفسك وانشر"

والا اللي ايقول لك: إذا تبي لا ترسلها... بس الأجر بيروح عليك...

يعني الأجر ألحين كله صار في هالإيميل...؟

ومن خولكم تطلبون من خلق الله ترسل إيميل؟؟؟ مو على كيفكم من يرسل ومن ما يرسل وشو يرسل...

والمتفلسف يقول لك: لا تخلي الشيطان يلعب عليك وما ترسلها

احذر أن يوسوس لك إبليس أن لا ترسلها

احلفوا عاد؟؟؟

الشيطان يلعب عليكم وماكل بعقلكم حلاوة وانتوا بس تارسين لنا الـinbox بإيميلات متشابهة كل يوم نفسها توصلنا

وعباقرة الرياضيات: ارسلها مرة تكسب 456739832469 حسنة

ارسلها مرتين تكسب 849656504594547664444748700000

حسنة..

"؟؟؟؟؟؟؟؟؟؟؟؟"

بس ملينا.. حتى الدين ما رحمتوه؟؟

ياجماعة.. "الكلمة طيبة صدقة"

والدين يسر...

الإيميل وسيلة تبادل معلومات خفيفة واستفادة... مومركز خدمات أمراض الموت... ولا مركز التحذيرات من عصابات ، ولا أداة للتنفير من الدين ونشر فتاوى شيوخ سبيس تون

وإذا الإيميل له قيمة وفيه فايدة الكل بينشره بدون صيغة الأمر البايخة.. وطريقة أرجوك أحب خشمك ترسلها

والناس أدرى باللي ينفعهم، ما يحتاجون أحد يقول لهم وش يسوون

خلوا الإيميل جزء حلو من اليوم، يرسم ابتسامة، ويضيف معلومة

هههههههههههههههههههههههههههههههههه

اخي القارئ / اختي القارئة

.. تذكــــــــروا ..

ان تتأكدوا من مصدر أي شيء تنشرونه

مو تنقلون كل شي ولا دارين عن الهرجة

حتى ان فيه بعض الناس الله يهديهم ما يقرون الموضوع

شافوا العنوان وعلى طول ارسل

الله يعيننا وإياكم على نشر الخير

ولا شيء سوا الخير ... وسلامتكم

للأمانة منقول من علبة الوارد في ايميلي .... خخخخخخخخ

ههههههههههههههاااااااااااااي
صدق .. الدنيا فوضه كل شي فيه بلى
يعطيك الف عافيه خيتوو
على النقل
لا عدمناك

زائر

ههههههههههههههه
يسلمووووو

هاهاهاهاهاهاها
ويعطيك الف1000 عافيه

تسسسسلمون
يا الغوالي
وجودكم اضاء صفحتي
لا عدمناكم